គម្រោងកសាងសមត្ថភាពក្នុងការគ្រប់គ្រងព្រៃឈើប្រកបដោយនិរន្តរភាពតាមរយៈការអភិវឌ្ឍន៍ផែនការគ្រប់គ្រងសហគមន៍ព្រៃឈើ និង សហគមន៍តំបន់ការពារធម្មជាតិ (SFM)
គម្រោងកសាងសមត្ថភាពក្នុងការគ្រប់គ្រងព្រៃឈើប្រកបដោយនិរន្តរភាពតាមរយៈការអភិវឌ្ឍន៍ផែនការគ្រប់គ្រងសហគមន៍ព្រៃឈើ និង សហគមន៍តំបន់ការពារធម្មជាតិ (SFM)
សាវតាគម្រោង
តំបន់ទេសភាពជួរភ្នំក្រវាញភាគខាងជើងគ្របដណ្តប់លើ ខេត្ត តំបន់គោលដៅ (ខេត្តបាត់ដំបង ខេត្តកំពង់ឆ្នាំង ខេត្តកំពង់ស្ពឺ និងខេត្តពោធិ៍សាត់) គឺជាតំបន់ ដែលសំបូរទៅដោយព្រៃឈើនឹងជាជម្រកនៃជីវៈចំរុះគ្រប់ប្រភេទ (ស្ថិតចំកណ្តាលព្រៃទឹកភ្លៀងជួរភ្នំក្រវាញ) ហើយក៏ជាតំបន់ដ៏សំខាន់សម្រាប់ផ្ទុកកាបូន ប៉ុន្តែតំបន់នេះកំពុងទទួលរងនូវការគំរាមកំហែងធ្ងន់ធ្ងរផងដែរ។ គម្រោងនឹងបង្កើតនូវឱកាសក្នុងការកាត់បន្ថយនូវការកាប់បំផ្លាញព្រៃឈើ ព្រមទាំងរួមចំណែកកាត់បន្ថយភាពក្រីក្រតាមរយៈការគ្រប់គ្រងព្រៃឈើប្រកបដោយនិរន្តរភាព។ កត្តាសំខាន់ដែលនាំឲ្យមានការគំរាមកំហែងទាំងអស់នេះ គឺបណ្តាលមកពីការប្រើប្រាស់ធនធានព្រៃឈើជាសាធារណៈ អភិបាលកិច្ចនៅមានកំរិត និងតំរូវការប្រើប្រាស់ដីធ្លី និងផលិតផលព្រៃឈើមានកំរិតខ្ពស់។ បញ្ហាសំខាន់ដែលគម្រោងត្រូវធ្វើការឆ្លើយតបគឺ ប្រធានបទនៃការរេចរឹល និងការបាត់បង់ព្រៃឈើនៅកម្ពុជា ដែលបណ្តាលមកពីកង្វះខាតនូវសមត្ថភាព និងការលើកទឹកចិត្តដល់រដ្ឋាភិបាល និងប្រជាជនក្នុងការធានានូវការគ្រប់គ្រងធនធានឲ្យមាននិរន្តរភាព(ឯកសារគម្រោង SFM ២០១១)។
គោលបំណងរបស់គម្រោង
ធ្វើផែនការគ្រប់គ្រងសហគមន៍ព្រៃឈើ រួមទាំងផែនការអាជីវកម្មសហគមន៍ព្រៃឈើចំនួន៣០សហគមន៍ និងផែនការគ្រប់គ្រងសហគមន៍តំបន់ការពារធម្មជាតិចំនួន១០សហគមន៍ ដែលស្ថិតនៅក្នុងខេត្តចំនួន០៤។
សាកល្បងគំរូផ្សេងៗទៀតនៃសហគមន៍ព្រៃឈើ០៤ (សហគមន៍ព្រៃការពារ សហគមន៍ព្រៃផ្តល់ផល និងព្រៃឈើដៃគូ)។
ធ្វើផែនការប្រើប្រាស់ដីធ្លីថ្នាក់ឃុំចំនួន០៤ឃុំ (១ឃុំ ក្នុង១ខេត្ត)។
ធ្វើសច្ចាប័ន ស្តីពីគោលការណ៍ណែនាំបង្កើតសហគមន៍តំបន់ ការពារធម្មជាតិ។
លទ្ធផលរបស់គម្រោង
១. នៅថ្នាក់ជាតិមានសមត្ថភាព និង ឧបករណ៍សំភារៈដើម្បីសម្រួល និងពង្រីកការអនុវត្តការគ្រប់គ្រងធនធានព្រៃឈើប្រកបដោយ និរន្តរភាពដោយផ្អែកលើសហគមន៍។
២. ការគ្រប់គ្រងព្រៃឈើប្រកបដោយនិរន្តរភាព ដោយផ្អែកលើសហគមន៍នឹងត្រូវបានអនុវត្តន៍ដោយមានប្រសិទ្ធិភាពជាមួយបរិបទរដ្ឋបាលព្រៃឈើថ្នាក់ខណ្ឌ/ខេត្ត ការធ្វើផែនការថា្នក់ឃុំ និងស្រុក ហើយត្រូវប្រាកដថា ប្រជាសហគមន៍មូលដ្ឋានទទួលបានអត្ថប្រយោជន៍ពីគម្រោង។
សមាសធាតុសំខាន់ៗ ដើម្បីសម្រេចបាននូវលទ្ធផលគម្រោង
វីធីសាស្រ្តនៃការធ្វើសមាហរ័ណកម្មនៃតំបន់ទេសភាពក្នុងការជ្រើសរើសតំបន់គោលដៅ។
ក្រុមជំនាញដែលផ្តោតទៅលើការកសាងសមត្ថភាព និងការគាំទ្រផ្នែកបច្ចេកទេស គោលនយោបាយ ច្បាប់ ដើម្បីទ្រទ្រង់នូវការសម្រេចបាននូវលទ្ធផល ដោយមានការគាំទ្រពីអង្គការ RECOFTC។
វិធីសាស្រ្តនៃការបង្កើតសហគ្រាស ដោយផ្សារភ្ជាប់ជាមួយ វិស័យឯកជន និងទីផ្សារ ដើម្បីលើកស្ទួយដល់ការរកប្រាក់ ចំណូលប្រជាសហគមន៍។
កិច្ចសហការ និងទំនាក់ទំនងទៀងទាត់ជាមួយដៃគូ និងការរៀបចំឯកសារស្តីអំពីការអនុវត្តន៍ និងមេរៀនល្អៗ។
ការបញ្ចូលនូវសមាសភាគទូទៅនៅក្នុងសង្គម និងការបញ្ជ្រាបយែនឌ័រ។
សមាសភាគ និង សកម្មភាពសំខាន់ៗ របស់គម្រោង៖
សមាសភាគទី១. ការបង្កើតព័ត៌មានមូលដ្ឋាន៖ ប្រមូលព័ត៌មាន បង្កើតបណ្តុំព័ត៌មានមូលដ្ឋាន និងថែរក្សាទុកដាក់ព័ត៌មានមូលដ្ឋាន។
សមាសភាគទី២. ការកសាងសមត្ថភាពដល់ (ការបណ្តុះបណ្តាលដើម្បីធ្វើសកម្មភាព) មន្ត្រីរដ្ឋបាលព្រៃឈើ មន្រ្តីមន្ទីរបរិស្ថាន មន្រ្តីមន្ទីររៀបចំដែនដី នគរូបនីកម្ម សំណង់ និង សុរិយោដី មន្រ្តីឧទ្យានជាតិ គណៈកម្មការគ្រប់គ្រងសហគមន៍ព្រៃឈើ គណៈកម្មការគ្រប់គ្រងសហគមន៍តំបន់ការពារធម្មជាតិ និងដៃគូពាក់ព័ន្ធផ្សេងៗទៀត៖
វិធីសាស្រ្តគ្រប់គ្រង និងការអភិរក្សព្រៃឈើដោយផ្អែកលើសហគមន៍។
ការធ្វើផែនការគ្រប់គ្រងព្រៃឈើ។
ការគាំទ្រដល់ការអភិវឌ្ឍអាជីវកម្ម។
និរន្តរភាពហិរញ្ញាវត្ថុ។
សមាសភាគទី៣. ការធ្វើផែនការប្រើប្រាស់ដីធ្លីថ្នាក់ឃុំ (CLUP)៖ រៀបចំផ្តល់ការបណ្តុះបណ្តាលស្តីពី CLUP នៅថ្នាក់ខេត្ត និង ចាប់ផ្តើមអនុវត្តន៍ផែនការ CLUP ។
សមាសភាគទី៤. គំរូផ្សេងៗទៀត នៃសហគមន៍ព្រៃឈើ៖ បង្កើត និងអនុវត្តន៍នូវគំរូផ្សេងៗទៀត នៃសហគមន៍ព្រៃឈើ ដោយរៀបចំនូវរចនាសម្ព័ន្ធគ្រប់គ្រងនិងផែនការគ្រប់គ្រង
សមាសភាគទី៥. សមាហរ័ណកម្មផែនការអាជីវកម្ម និង ទីផ្សារ បញ្ចូលទៅក្នុងផែនការគ្រប់គ្រងសហគមន៍ព្រៃឈើ៖
រៀបចំផែនការគ្រប់គ្រងសហគមន៍ព្រៃឈើ និងសហគមន៍តំបន់ការពារធម្មជាតិ។
អភិវឌ្ឍន៍សហគ្រាស ការរៀបចំធ្វើផែនការគ្រប់គ្រងសហគមន៍ព្រៃឈើ សហគមន៍តំបន់ការពារធម្មជាតិ និងការអភិវឌ្ឍផែនការអាជីវកម្មដោយផ្អែកលើការវិភាគទីផ្សារ។
ការចូលរួមត្រួតពិនិត្យ និងវាយតំលៃ។
សមាសភាគទី៦. ការចងក្រងឯកសារ និង មេរៀនបទពិសោធន៍ការងារ
ប្រើប្រាស់បទពិសោធន៍ការងារតាមតំបន់គោលដៅ ដើម្បីចងក្រងមេរៀនបទពិសោធន៍ការងារ និងជាគោលការណ៍សម្រាប់ធ្វើការអំណះអំណាច
ការគាំទ្រដល់ទីភ្នាក់ងាររដ្ឋាភិបាលឲ្យត្រួតពិនិត្យឡើងវិញ នូវការព្រៀងច្បាប់ពាក់ព័ន្ធ។
សមាសភាគទី៧. យុទ្ធសាស្រ្តហិរញ្ញាវត្ថុដើម្បីគាំទ្រគម្រោង គ្រប់គ្រងព្រៃឈើប្រកបដោយនិរន្តរភាព៖ ការបង់សេវាកម្មអេកូស៊ី និងចូលរួមកាត់បន្ថយការបំភាយឧស្ម័នផ្ទះកញ្ចាក់ ដែលបណ្តាលមកពីការកាប់បំផ្លាញនិងការរេចរឹលព្រៃឈើ រួមទាំងការគាំទ្រដល់ប្រាក់ចំណូលក្នុងសហគមន៍។
សមាសភាគទី៨. ការផ្សព្វផ្សាយ និងការធ្វើសច្ចាប័ន៖ រៀបចំបង្កើតមូលដ្ឋានគ្រឹះមួយសម្រាប់ធ្វើជាគំរូ និងការ អនុវត្តដ៏ល្អដោយផ្សារភ្ជាប់នឹងនិរន្តរភាពនៃគម្រោង
សមាសភាគទី៩. យុទ្ធសាស្រ្តដកថយដោយផ្អែកលើការសម្របសម្រួលពីភាគីពាក់ព័ន្ធ៖
ផ្តល់ការណែនាំទៅលើយុទ្ធសាស្រ្តឲ្យបានត្រឹមត្រូវតាមលំដាប់លំដោយពីគម្រោង ដើម្បីបន្តអនុវត្តន៍សកម្មភាពប្រកបដោយនិរន្តរភាព។
រយៈពេល នៃការអនុវត្តន៍គម្រោង ៖ ចាប់ពីខែមេសា ២០១២ ដល់ខែកុម្ភៈ ឆ្នាំ២០១៥ (រយៈពេល៣ឆ្នាំ)។
ទំហំ និងតំបន់គោលដៅ នៃគម្រោង
គម្រោងនឹងត្រូវអនុវត្តន៍នៅថ្នាក់ជាតិ និងថ្នាក់ក្រោមជាតិក្នុង០៤ខេត្ត ដែលស្ថិតក្នុងតំបន់ជួរភ្នំក្រវាញភាគខាងជើងរួមមានៈ ខេត្តកំពង់ស្ពឺ ខេត្តកំពង់ឆ្នាំង ខេត្តពោធិ៍សាត់ និងខេត្តបាត់ដំបង ដែលវាអាចរួមចំណែកជួយអន្តរាគមន៍ដល់តំបន់ជួរភ្នំក្រវាញភាគខាងជើង ក្នុងការអភិរក្សតំបន់ការពារធម្មជាតិ និងតំបន់ព្រៃឈើការពារ។ តំបន់ការពារធម្មជាតិ គឺជាគោលដៅសម្រាប់ធ្វើការអភិវឌ្ឍ ផែនការគ្រប់គ្រងសហគមន៍តំបន់ការពារធម្មជាតិ រួមមានដែនជម្រកសត្វព្រៃភ្នំសំកុស និង ភ្នំឱរ៉ាល់។
ដៃគូអនុវត្តន៍ការងារ
គម្រោងអនុវត្តន៍ដោយអង្គការ RECOFTC ក្នុងភាពជាដៃគូជាមួយអង្គការម្លប់បៃតង (Mlup Baitong) ដោយសហការយ៉ាងជិតស្និទ្ធជាមួយរដ្ឋបាលព្រៃឈើ (ភាគី A) នៃក្រសួងកសិកម្ម រុក្ខាប្រមាញ់ និងនេសាទ អគ្គនាយកដ្ឋានរដ្ឋបាលការពារ និងអភិរក្សធម្មជាតិ (ភាគី B) នៃក្រសួងបរិស្ថាន ក្រសួងរៀបចំដែនដី នគរូបនីកម្ម និងសំណង (ភាគី C) ហើយសមាសភាគទី២ នៃគម្រោងអនុវត្តន៍ ដោយអង្គការ Geres។ សមាសភាគទាំងពីរ នៃគម្រោងមាន ការរួមចំណែកគាំទ្រថវិកាពី ForInfo/Finnish MFA ផងដែរ។