សមាជព្រៃឈើពិភពលោកបានកំណត់ទស្សនវិស័យព្រៃឈើនៅពេលអនាគត
សហគមន៍មូលដ្ឋានមកពីប្រទេសមួយចំនួនក្នុងទ្វីបអាស៊ី បានធ្វើការអំពាវនាវដល់រដ្ឋាភិបាល និងអ្នកពាក់ព័ន្ធនៅក្នុសមាជព្រៃឈើពិភពលោក
ថ្ងៃទី១១ ខែកញ្ញា ឆ្នាំ២០១៥ - ទីក្រុងឌូបាន ប្រទេសអាហ្រិ្វកខាងត្បូង៖ សមាជព្រៃឈើពិភពលោកលើកទី១៤ ក្នុងទីក្រុងឌូបាន ប្រទេសអាហ្វ្រិកខាងត្បូង ត្រូវបានបញ្ចប់ដោយលើកឡើងថា គេត្រូវតែទទួលស្គាល់ថាព្រៃឈើពិភពលោក មានសារៈសំខាន់លើសពីអ្វីដែលយើងមើលឃើញ ”(http://www.fao.org/about/meetings/world-forestry-congress/en/)
ព្រៃឈើមានសក្តានុពលខ្លាំងក្លា និងដើរតួនាទីសំខាន់ក្នុងការលើកកម្ពស់របរចិញ្ចឹមជីវិត និងកាត់បន្ថយការប្រែប្រួលអាកាសធាតុ។
សមាជព្រៃឈើពិភពលោកនេះគឺជាការប្រមូលផ្តុំដ៍ធំមួយក្នុងវិស័យព្រៃឈើ ដើម្បីកំណត់ទស្សនវិស័ព្រៃឈើនៅក្នុងឆ្នាំ ២០៥០ និងការអនុម័តលើសេចក្តីថ្លែងការទីក្រុងឌូបាន (Durban Declaration) បន្ទាប់ពីកិច្ចពិភាក្សាអស់រយៈពេលច្រើនថ្ងៃរួចមក។ ទស្សនវិស័យនេះបានលើកឡើងថា នៅពេលអនាគតព្រៃឈើគឺជា “ប្រភពចម្បង” សម្រាប់សន្តិសុខស្បៀង និងការលើកកម្ពស់របរចិញ្ចឹមជីវិត។
សេចក្តីថ្លែងការនេះបានលើកឡើងពីការរួមបញ្ចូលព្រៃឈើទៅក្នុងការប្រើប្រាស់ដីធ្លីផ្សេងៗដូចជា កសិកម្មជាដើម ដើម្បីដោះស្រាយបញ្ហានៃការបាត់បង់ព្រៃឈើ និងទំនាស់ដីធ្លីនានា។
ការគ្រប់គ្រងព្រៃឈើប្រកបដោយនិរន្តរភាពគឺជា “ដំណោះស្រាយដ៏សំខាន់” ក្នុងការកាត់បន្ថយការប្រែប្រួលអាកាសធាតុ បង្កើនការស្តុកការបោន និងផ្តល់សេវាកម្មបរិស្ថានផ្សេងៗ។
ភាពជាដៃគូ និងការវិនិយោគមានសារៈសំខាន់
សេចក្តីថ្លែងការនេះ គូសបញ្ជាក់នូវសកម្មភាពជាបន្តបន្ទាប់ដើម្បីសម្រេចបានទស្សនវិស័យដែលបានកំណត់ រួមមានទាំង ការវិនិយោគបន្ថែមទៀតទៅលើការអប់រំអំពីព្រៃឈើ ការទំនាក់ទំនង ការស្រាវជ្រាវ និងការបង្កើតឱកាសការងារ ជាពិសេសសម្រាប់យុវជន។ បន្ថែមពីលើនេះទៀត សេចក្តីថ្លែងការនេះ បានសង្កត់ធ្ងន់ទៅលើតម្រូវការភាពជាដៃគូបន្ថែមទៀតនៅក្នុងវិស័យព្រៃឈើ កសិកម្ម ហិរញ្ញប្បទាន ថាមពល ទឹក និងវិស័យផ្សេងទៀត ទៅនឹងជនជាតិដើមភាគតិច និងសហគមន៍មូលដ្ឋាន។
លោក Tiina Vähänen នាយករងផ្នែកអភិរក្ស គ្រប់គ្រង និងវាយតម្លៃព្រៃឈើ នៃអង្គការស្បៀង និងកសិកម្មនៃសហប្រជាជាតិ (FAO) បានមានប្រសាសន៍ថា៖ “សេចក្តីថ្លែងការនេះឆ្លុះបញ្ចាំងពីបទពិសោធន៍ និងទស្សនៈសំបូរបែបរបស់អ្នកចូលរួមទាំងអស់នៅក្នុងសមាជនេះ ដែលបានផ្តល់អនុសាសន៍ដើម្បីរកយុទ្ធសាស្រ្តសម្រចឱ្យបាននូវទស្សនវិស័យដែលបានកំណត់ឡើង”។
ប្រតិភូជិត ៤.០០០នាក់មកពី ១២៤ ប្រទេសផ្សេងគ្នា ជុំវិញពិភពលោក បានចូលរួមក្នុងសមាជនេះ រួមមានទាំងតំណាងសង្គមស៊ីវិល អង្គការក្រៅរដ្ឋាភិបាល ស្ថាប័នរដ្ឋាភិបាល គ្រឹះស្ថានអប់រំ និងវិស័យឯកជន ព្រមទាំងរដ្ឋមន្រ្តី និងឧបនាយករដ្ឋមន្រ្តីប្រហែល ៣០រូបផងដែរ។
សារសំខាន់ៗស្តីពីគោលដៅអភិវឌ្ឍដោយចីរភាព
សមាជបានលើកឡើងថា ព្រៃឈើមានសារៈសំខាន់ក្នុងការសម្រេចបាន គោលដៅអភិវឌ្ឍដោយចីរភាពទី១៧។ នេះជាសារដ៍សំខាន់ផ្ញើរទៅកាន់កិច្ចប្រជុំកំពូលស្តីពីការអភិវឌ្ឍប្រកបដោយចីរភាពរបស់អង្គការសហប្រជាជាតិដែលនឹងធ្វើឡើងនៅចុងខែនេះ នាទីក្រុងញូយ៉ក ដើម្បីដាក់បញ្ចូលនៅក្នុងរបៀបវារៈនៃការអភិវឌ្ឍឆ្នាំ ២០៣០។
គោលដៅអភិវឌ្ឍដោយចីរភាពទី១៥ បានបង្ហាញពីតម្រូវការនៃការគ្រប់គ្រងព្រៃឈើប្រកបដោយនិរន្តរភាព។ ព្រៃឈើដើរតួនាទីសំខាន់ដើម្បីឈានទៅរកការសម្រេចបានកត្តាផ្សេងៗទៀតជាច្រើនដែលមានចែងនៅក្នុងគោលដៅទាំង១៦ ដោយរួមមានទាំងការលប់បំបាត់ភាពអត់ឃ្លាន ការសម្រេចបាននូវសន្តិសុខស្បៀង ការលើកកម្ពស់កសិកម្ម និងការធានានិរន្តរភាពថាមពលប្រើប្រាស់សម្រាប់មនុស្សរាល់គ្នា។
សារស្តីពីការប្រែប្រួលអាកាសធាតុ
សមាជបានរៀបចំសារសំខាន់ៗសម្រាប់កិច្ចប្រជុំ COP21 នៃបណ្តាភាគីអនុសញ្ញាក្របខណ្ឌសហប្រជាជាតិស្តីពីការប្រែប្រួលអាកាសធាតុ ប្រារព្ធឡើងនៅខែធ្នូ ឆ្នាំ២០១៥ ដែលនឹងសម្រេចឱ្យបានកិច្ចព្រមព្រៀងថ្មីមួយជាសកលស្តីពីការប្រែប្រួលអាកាសធាតុ។
ការប្រែប្រួលអាកាសធាតុ គំរាមកំហែងយ៉ាងធ្ងន់ធ្ងរដល់ភពផែនដី ព្រៃឈើ និងអ្នកអាស្រ័យផលពីព្រៃឈើ។ ជាមួយគ្នានេះដែរ ការឆ្លើយតបរបស់ប្រទេសនីមួយៗទៅនឹងការប្រែប្រួលអាកាសធាតុបានបង្កើតឱ្យមានឱកាសថ្មីៗក្នុងវិស័យព្រៃឈើ ដូចជាប្រភពបន្ថែមនៃហិរញ្ញប្បទាន និងការគាំទ្រនយោបាយចំពោះអភិបាលកិច្ចព្រៃឈើ។
អ្នកចូលរួមក្នុងសមាជទាំងអស់ បានផ្តល់អនុសាសន៍ដើម្បីធ្វើសកម្មភាពដូចជា ការលើកកម្ពស់ការយល់ដឹងក្នុងចំណោមរដ្ឋាភិបាល និងអ្នកពាក់ព័ន្ធនានា រួមទាំងឱកាស និងបញ្ហាប្រឈមស្តីពីការប្រែប្រួលអាកាធាតុ។
ផែនការសកម្មភាពព្រៃឈើ និងការប្រើប្រាស់ទឹក
នៅក្នុងសមាជនេះ ក៏មានការសម្ពោធដាក់ឱ្យប្រើប្រាស់ជាផ្លូវការនូវផែនការសកម្មភាពព្រៃឈើ និងការប្រើប្រាស់ទឹក ដែលទទួលស្គាល់ពីសារៈសំខាន់នៃតួនាទីរបស់ព្រៃឈើនៅក្នុងការរក្សាវដ្តទឹក និងធានាបានការគ្រប់គ្រងសមស្របនៃប្រភពទឹកសាបដ៏ធំជាងគេនៅក្នុងពិភពលោក។
សមាជព្រៃឈើពិភពលោកធ្វើឡើងក្នុងរយៈពេល ៦ឆ្នាំម្តង។ ប្រធានបទនៃសមាជលើកនេះគឺ ព្រៃឈើ និងមនុស្ស៖ ការវិនិយោគទៅអនាគតប្រកបដោយនិរន្តរភាព ។ សមាជនេះប្រារព្ធឡើងនៅក្នុងប្រទេសអាហ្រ្វិកខាងត្បូង គាំទ្របច្ចេកទេសដោយអង្គការ FAO និងជាលើកដំបូងដែលធ្វើឡើងនៅក្នុងទ្វីបអាហ្រិ្វកចាប់តាំងពីឆ្នាំ១៩២៦មក។
សហគមន៍មូលដ្ឋានមកពីទ្វីបអាស៊ីដែលចូលរួមក្នុងសមាជនេះ
សមាជិសហគមន៍មូលដ្ឋានចំនួន ៦រូប រួមនឹងបុគ្គលិក និងប្រតិភូអង្គការរីខូហ្វ បានចូលរួមក្នុងសមាជពិភពលោកនេះ។
សហគមន៍មូលដ្ឋានរួមមាន៖
លោកស្រី Theya Chaw ជនជាតិដើមភាគតិចណាហ្គា មកពីក្រុង Layshee តំបន់ Sagaing ប្រទេសមីយ៉ាន់ម៉ា។ លោកស្រីគឺជាគ្រូបង្គោលរេដបូកនៅថ្នាក់ក្រោមជាតិ។
លោក Krik Meemugkit អ្នកជំនួញខ្នាតតូច និងជាប្រធានសាខានៃធនាគារឈើ (Tree Bank) មកពីខេត្ត Krakaew ប្រទេសថៃ។
លោកស្រី Hoang Thi Chuyen ជនជាតិដើមភាគតិច Tay និងជាសមាជិកសហជីពស្រ្តីក្នុងភូមិ Ba Khe ឃុំ Cat Thinh ប្រទេសវៀតណាម។
លោក ឯម សុភាន់ អនុប្រធានគណៈកម្មាធិការគ្រប់គ្រងសហគមន៍ព្រៃឈើជ្រោះស្វាយ មកពីប្រទេសកម្ពុជា។
លោក Khun Zaw តំណាងយុវជន មកពីប្រទេសមីយ៉ាន់ម៉ា។
លោក Kriengkrai Cheechaung សមាជិកជនជាតិដើមភាគតិច មកពីប្រទេសថៃ។
ពួកគេគ្រប់រូបបានធ្វើបទបង្ហាញនៅក្នុងកម្មវិធីជាង ៣០ក្នុងសមាជព្រៃឈើពិភពលោកនេះ ដោយរួមមានទាំងកិច្ចពិភាក្សា និងសកម្មភាពផ្សេងៗទៀតក្នុងរយៈពេល ៥ថ្ងៃនេះ។
“បើទោះបីជាយើងដឹងហើយថាការអភិរក្សព្រៃឈើមានសារៈសំខាន់ក៏ដោយ ក៏សហគមន៍មូលដ្ឋាននៅតែជួបប្រទះនូវឧបសគ្គនៅក្នុងការប្រកបរបរចិញ្ចឹមជីវិតរបស់ពួកយើង។ ជនជាតិដើមភាគតិចណាហ្គា ចំបាច់ត្រូវរៀបចំសហគ្រាសព្រៃឈើប្រកបដោយនិរន្តរភាព ដើម្បីរួមចំណែកបង្កើនប្រាក់ចំណូលក្នុងគ្រួសារ។ ប្រើសិនបើគម្រោងនេះទទួលបានជោគជ័យ នេះមានន័យថាយើងមិនត្រឹមតែបានលើកកម្ពស់ការចឹញ្ចឹមជិវិតតែប៉ុណ្ណោះទេ ថែមទាំងអាចថែរក្សាព្រៃឈើ និងសត្វព្រៃបានផងដែរ” នេះជាការលើកឡើងរបស់លោកស្រី Theya Chaw ដែលជាសមាជិកជនជាតិដើមភាគតិចណាហ្គា មកពីប្រទេសមីយ៉ាន់ម៉ា។ “ខ្ញុំបានពាំនាំសម្លេងរបស់សហគមន៍មូលដ្ឋានរបស់ខ្ញុំមកកាន់សមាជនេះ។ ខ្ញុំសប្បាយរីករាយ នឹងនាំយកលទ្ធផលនៃសមាជព្រៃឈើពិភពលោកនេះត្រឡប់ទៅមូលដ្ឋានរបស់ខ្ញុំវិញ”។
លោក Krirk Meemungkit អ្នកជំនួញខ្នាតតូច មកពីប្រទេសថៃបានលើកឡើងថា៖ “ប្រសិនបើយើងដាំដើមឈើនៅក្នុងចំការរបស់យើង យើងអាចប្រមូលផលវា ហើយនឹងជួយសម្រួលក្នុងការដោះស្រាយបំណុល និងកាត់បន្ថយភាពក្រីក្របាន។ បញ្ហាដែលកសិករជាច្រើនបានជួបប្រទះនោះគឺ ឈើដែលដំានៅលើដីកសិកម្មរបស់រដ្ឋាភិបាល គឺជាកម្មសិទ្ធស្របច្បាប់របស់រដ្ឋ ហើយដំណើរការនៃការគ្រប់គ្រងមានលក្ខណៈស្មុគស្ថាញ ដែលនេះមិនបានលើកទឹកចិត្តប្រជាជនឱ្យដំាឈើឡើយ។ លោកបានបន្ថែមទៀតថា៖ “ត្រូវផ្តល់សិទ្ធដល់បណ្តាញប្រជាជនក្នុងការចូលរួមថែរក្សាព្រៃឈើ។ រដ្ឋាភិបាលគួតែផ្តល់ការគាំទ្របន្ថែមទៀត ទៅលើសិទ្ធរបស់ប្រជាជនមូលដ្ឋាន ដើម្បីទទួលបានផលប្រយោជន៍ជាអតិប្បរិមាពីការដំាដុះឈើនេះ”។
ចំណែកលោក ឯម សុភាន់ អនុប្រធានគណៈកម្មាធិការគ្រប់គ្រងសហគមន៍ព្រៃឈើជ្រោះស្វាយ មកពីប្រទេសកម្ពុជាបានមានប្រសាសន៍ថា៖ “នៅចន្លោះពីឆ្នាំ ១៩៩៣ ដល់ឆ្នាំ២០០៩ ខ្ញុំសង្កេតឃើញធនធានព្រៃឈើមានថយចុះជាខ្លាំង ដោយសារការប្រើប្រាស់ហួសកំណត់ និងមិនមានកាចូលរួមគ្រប់គ្រងពីសហគមន៍។ ដូចនេះដោយមានការគាំទ្រពីអង្គការរីខូហ្វ និងរដ្ឋបាលព្រៃឈើ យើងបានបង្កើតជាសហគមន៍ព្រៃឈើឡើង។ ពេលនោះដែរ ខ្ញុំក៏បានសិក្សាពីការគ្រប់សហគ្រាសជំនួញ និងបានបង្កើតក្រុមជំនួញឬស្សីឡើង ដែលមានសមាជិកចំនួន ១៥០គ្រួសារ។ នៅក្នុងឆ្នាំ ២០១៤ យើងប្រមូលផលឬស្សីបានសរុបជាទឹកប្រាក់ចំនួន ៨.៧៥៤ដុល្លារអាមេរិក។ ចំណូលនេះយើងបែងចែកទៅក្នុងមូលនិធិអភិវឌ្ឍសហគមន៍ព្រៃឈើ ភាគលាភគណៈកម្មការ និងចំណាយរដ្ឋបាល។ សមាជិកអាចទៅប្រមូលឬស្សីដោយរកចំណូលបាន ៥៦ដុល្លារជាមធ្យមក្នុងមួយឆ្នាំ។ យើងមើលទៅថវិកានេះមិនច្រើនទេ ប៉ុន្តែវាមានសារៈសំខាន់ណាស់សំរាប់គ្រួសារកសិករក្រីក្រ។ យើងសង្ឃឹមថាបើពួកយើងទទួលបានការអភិវឌ្ឍសមត្ថភាពន្ថែមទៀត យើងនឹងអាចពង្រីកសហគ្រាសរបស់យើងនៅពេលអនាគតបាន”។
លោកស្រី Hoang Thi Chuyen មកពីប្រទេសវៀតណាមបានមានប្រសាសន៍ថា៖ “នៅក្នុងប្រទេសវៀតណាម បុគ្គលគ្រប់រូបមានសិទ្ធគ្រប់គ្រងដីរបស់ពួកគេ។ នេះគឺជាអ្វីឡើងបានចែងនៅក្នុងសៀវភៅក្រហម (Red Book)។ សិទ្ធនេះបានគាំទ្រខ្ញុំក្នុងការការពារព្រៃឈើរបស់ខ្ញុំ មិនឱ្យអ្នកខាងក្រៅរំលោភបំពានបាន។ វាក៏បានជួយខ្ញុំ និងគ្រួសាររបស់ខ្ញុំឱ្យរួចផុតពីភាពក្រីក្រផងដែរ។ ឥឡូវនេះព្រៃឈើគ្របដណ្តប់ប្រហែល ៧០% នៃភូមិរបស់យើងទាំងមូល។ សៀវភៅក្រហមដើរតួនាទីសំខាន់ធានាដល់ភាពជាម្ចាស់កម្មសិទ្ធ ប៉ុន្តែនេះជាជំហានទីមួយនៅឡើយដែលលើកឡើងថា និរន្តរភាពទាមទារនូវសមត្ថភាពសមស្រប និងមានផែនការការពារ ផែនការជំនួញ ផែនការដាំឈើ និងផែនការផ្សេងៗទៀត”។ លោកស្រីក៏បានបន្ថែមទៀតថា៖ “មានតែអង្គការរីខូហ្វដែលបានគាំទ្រសហគមន៍មូលដ្ឋានជាច្រើនអោយចូលរួមក្នុងសមាជនេះ។ ខ្ញុំសង្កេតឃើញជាទូទៅថា មានប្រជាជនមូលដ្ឋានតិចតួចតែប៉ុណ្ណោះបានមកចូលរួមក្នុងសមាជព្រៃឈើពិភពលោកនេះ។ ខ្ញុំសង្ឃឹមថានៅពេលអនាគត ប្រជាជនមូលដ្ឋានអាចចូលរួមដោយផ្ទាល់នៅក្នុងសមាជដូចនេះ”។
សារដែលសហគមន៍បានលើកឡើងនៅក្នុងសមាជព្រៃឈើពិភពលោកនេះបានរួមចំណែកក្នុងការកំណត់អាទិភាពនៃសិទ្ធរបស់សហគមន៍មូលដ្ឋាននៅក្នុងសេចក្តីថ្លែងការទីក្រុងឌូបានដែលបានលោកឡើងនៅក្នុងកថាខណ្ឌទី១ ថា៖ “ព្រៃឈើមានសារៈសំខាន់លើសពីអ្វីដែលយើងមើលឃើញ និងជាប្រភពចម្បងសម្រាប់សន្តិសុខស្បៀង និងការលើកកម្ពស់ការចិញ្ចឹមជីវិត។ ព្រៃឈើនៅពេលអនាគតនឹងជួយដល់សហគមន៍តាមរយៈការផ្តល់នូវប្រភពអាហារ ថាមពលអុស ជម្រក ស្មៅសម្រាប់សត្វ ប្រភពនៃការស្វែងរកចំណូល និងការងារដែលជួយជម្រុញឱ្យសហគមន៍ និងសង្គមមានការរីកចម្រើន”។
សម្រាប់ព័ត៌មានបន្ថែមសូមទំនាក់ទំនង ៖
លោកស្រី Caroline Liou អ្នកគ្រប់គ្រងផ្នែកទំនាក់ទំនង ប្រចាំអង្គការរីខូហ្វ អ៊ីម៉ែល៖ caroline.liou@recoftc.org (ភាសាអង់គ្លេស)