ការផ្សព្វផ្សាយបង្កើនចំណេះដឹងពីរេដបូក ដល់និសិ្សតសាកលវិទ្យាល័យភូមិន្ទកសិកម្ម
១.សេចក្តីផ្តើម
រេដបូក (REDD+) មានន័យថា “ការកាត់បន្ថយការបញ្ចេញឧស្ម័នផ្ទះកញ្ចក់តាមរយៈការកាត់បន្ថយការបាត់បង់ និងសឹករេចរិលព្រៃឈើក្នុងប្រទេសកំពុងអភិវឌ្ឍន៍” ដោយគិតបញ្ចូលពីការអភិរក្ស ការគ្រប់គ្រងព្រៃឈើដោយនិរន្តរភាព និងការបង្កើនកាបូនស្តុក។ យន្តការរេដនេះ ត្រូវបានលើកមកជជែកពិភាក្សាតាំងពីឆ្នាំ១៩៩៧ ក្នុងពិធីសាក្យូតូប៉ុន្តែត្រូវបានលេចជារូបរាងឡើងក្នុងឆ្នាំ២០០៩ បន្ទាប់ពីកិច្ចប្រជុំ COP លើកទី១៥ នៅទីក្រុងCopenhagen ហើយយន្តការនេះផងដែរ ត្រូវបានធ្វើឡើង ដោយសារតែការបាត់បង់ និងការសឹករេចរិលព្រៃឈើគឺជាមូលហេតុចំបងទី២ ដែលនាំឲ្យមានការកើនឡើងកំដៅផែនដី និងវាបានរួមចំណែកក្នុងការបញ្ចេញឧស្ម័នផ្ទះកញ្ចក់ចំនួន១៥%ទៅក្នុងបរិយាកាស។ មួយវិញទៀត ការកាត់បន្ថយការបាត់បង់ព្រៃឈើ និងការសឹករេចរឹលព្រៃឈើគឺជាវិធីសាស្រ្ត ដែលមិនត្រឹមតែជួយកាត់បន្ថយការបញ្ចេញឧស័្មនផ្ទះកញ្ចក់ប៉ុណ្ណោះទេ ប៉ុន្តែព្រៃឈើអាចជួយស្រូបយកកាបូនដែលបំភាយចេញពីសកម្មភាពផ្សេងៗទៀតផងដែរ។
រាជរដ្ឋាភិបាលកម្ពុជាបានគាំទ្រដល់ការរៀបចំ និងអនុវត្តន៍កម្មវិធីរេដបូក ដើម្បីរួមចំណែក គ្រប់គ្រងព្រៃឈើប្រកបដោយនិរន្តភាព អភិវឌ្ឍសេដ្ឋកិច្ចសង្គម និងកាត់បន្ថយការប្រែប្រួលអាកាសធាតុតាមរយៈការកាត់បន្ថយការបញ្ចេញឧស្ម័នផ្ទះកញ្ចក់។ ក្នុងឆ្នាំ២០១០ ក្រុមការងាររេដបូកកម្ពុជាបានបញ្ចប់ឯកសាផែនទីបង្ហាញផ្លូវរេដបូក ដែលជាឯកសារសំខាន់មួយសម្រាប់កម្ពុជាក្នុងការអនុវត្តរេដបូកក្នុងដំណាក់កាលត្រៀមលក្ខណៈអភិវឌ្ឍយន្តការរេដបូកនៅកម្ពុជា។ ការអនុវត្តរេដបូកនៅកម្ពុជា ត្រូវបានចែកចេញជាបីដំណាក់កាលរួមមាន៖ ដំណាក់កាលត្រៀមលក្ខណៈ ដំណាក់កាលអនុវត្តន៍ និងដំណាក់កាលការទូទាត់ផ្អែកតាមលទ្ធផល។ បច្ចុប្បន្ននេះកម្ពុជាកំពុងនឹងបញ្ចប់ដំណាក់កាលត្រៀមលក្ខណៈរបស់ខ្លួនហើយ ហើយឈានដល់ដំណាក់កាលអនុវត្តន៍ យុទ្ធសាស្រ្តរេដបូកជាតិ ។
ដើម្បីទទួលបានជោគជ័យក្នុងដំណើរការអនុវត្តរេដបូក តម្រូវឲ្យមានការចូលរួមពីគ្រប់ភាគីពាក់ព័ន្ធ ដូចនេះការផ្សព្វផ្សាយព័ត៌មាន និងការលើកកំពស់ចំណេះដឹងស្តីពីរេដបូកដល់អ្នកពាក់ព័ន្ធទាំងអស់ រួមទាំងនៅតាមគ្រឹះស្ថានអប់រំគឺពិតជាមានសារសំខាន់ណាស់។ ការផ្សព្វផ្សាយពីរេដបូកដល់និស្សិតសាកលវិទ្យាល័យមិនត្រឹមតែជួយបង្កើនចំណេះដឹង ដល់ពួកគេប៉ុណ្ណោះទេ ថែមទាំងរួមចំណែកដល់ការអនុវត្តយន្តការរេដបូកនាពេលខាងមុខផងដែរ។ លេខាធិការដ្ឋានរេដបូកកម្ពុជា និងក្រុមប្រឹក្សាយោបល់រេដបូក ក្រោយជំនួយថវិកាពីគម្រោង មូលនិធិភាពជាដៃគូកាបោនព្រៃឈើនៃអង្គការUNDPតាមរយៈមជ្ឈមណ្ឌលសម្រាប់មនុស្ស និង ព្រៃឈើ (រីខូហ្វ) នឹងរៀបចំការផ្សព្វផ្សាយបង្កើនចំណេះដឹងពីរេដបូកដល់និស្សិតសាកលវិទ្យាល័យភូមិន្ទកសិកម្ម នៅថ្ងៃទី២៥ ខែសីហា ឆ្នាំ២០១៧។
២. គោលបំណង
- ផ្តល់ការយល់ដឹងដល់ និស្សិត ពី ទស្សនទាន ដំណើរការ និងបច្ចុប្បន្នភាពរេដបូកនៅកម្ពុជា
- ផ្តល់ឱកាសដើម្បីឲ្យនិស្សិត និងក្រុមប្រឹក្សាយោបល់រេដបូកបានជួបនឹងចែករំលែកបទពិសោធន៍ពីគ្នាទៅវិញទៅមក សម្រាប់កិច្ចទំនាក់ទំនងនាពេលអនាគត
- ផ្តល់ជាមូលដ្ឋានសម្រាប់និស្សិតដែលមានបំណងសិក្សាស្វែងយល់បន្ថែមពីរេដបូកបានទទួលបានព័ត៌មាន សម្រាប់ការសិក្សារបស់ខ្លួន
៣.អ្នកចូលរួម និងពេលវេលា
កម្មវិធីផ្សព្វផ្សាយស្តីពីរេដបូកនេះ នឹងត្រូវធ្វើឡើងនៅថ្ងៃទី២៥ ខែសីហា ឆ្នាំ២០១៧ ដោយមានការចូលរួមពីនិស្សិតសាកលវិទ្យាល័យភូមិន្ទកសិកម្ម ចំនួន១៥០នាក់ នៅសាលប្រជុំសាកលវិទ្យាល័យភូមិន្ទកសិកម្ម ក្រុងភ្នំញ។