កិច្ចប្រជុំលើកទី៣ ប្រចាំឆ្នាំ ២០១៦ របស់គណៈកម្មការសម្របសម្រួលកម្មវិធីសហគមន៍ព្រៃឈើជាតិ (The 3rd NCFPCC Annual Meeting)
![RECOFTC Events RECOFTC Events](/sites/default/files/styles/event_feature_image/public/default_images/recoftc-placeholder-events-06.jpg?itok=ybcNEP2O)
សេចក្តីផ្តើម
ការគ្រប់គ្រងព្រៃឈើតាមបែបសហគមន៍ (សហគមន៍ព្រៃឈើ) នៅកម្ពុជា បានចាប់ផ្តើមតាំងពីពាក់កណ្តាលទសវត្សឆ្នាំ១៩៩០តាមរយៈគម្រោងសាកល្បងដោយមានការគាំទ្រពីរាជរដ្ឋាភិបាលកម្ពុជា អង្គការដៃគូជាតិនិងអន្តរជាតិ។ សហគមន៍ព្រៃឈើមានសត្តានុពលក្នុងការអភិរក្សព្រៃឈើ ធ្វើឲ្យប្រសើរឡើងនូវផលិតភាពរបស់ព្រៃ និងដើម្បីគាំទ្រដល់ជីវភាពរស់នៅរបស់សហគមន៍មូលដ្ឋាន ព្រមទាំងរក្សាបាននូវលំនឹងប្រព័ន្ធអេកូឡូស៊ីនិងចូលរួមកាត់បន្ថយនូវការប្រែប្រួលអាកាសធាតុ។
រាជរដ្ឋាភិបាលកម្ពុជាតាមរយៈរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ បានរៀបចំបង្កើតនូវក្របខណ្ឌគោលនយោបាយនិងច្បាប់សម្រាប់គាំទ្រដល់ការគ្រប់គ្រង និងអភិវឌ្ឍន៍សហគមន៍ព្រៃឈើ ក្នុងនោះរួមមាន ច្បាប់ស្តីពីព្រៃឈើត្រូវបានរដ្ឋសភាអនុម័តនិងបានប្រកាសឲ្យប្រើតាមរយៈព្រះរាជក្រមលេខ នស/រកម/០៨០២/០១៦ ចុះថ្ងៃទី៣១ ខែសីហា ឆ្នាំ២០០២ អនុក្រឹត្យស្តីពីការគ្រប់គ្រងសហគមន៍ព្រៃឈើ ចុះថ្ងៃទី០២ ខែធ្នូ ឆ្នាំ២០០៣ ប្រកាសស្តីពីគោលការណ៍ណែនាំអំពីសហគមន៍ព្រៃឈើ ចុះថ្ងៃទី២១ ខែកក្កដា ឆ្នាំ២០០៦ បានអនុម័តដោយក្រសួងកសិកម្ម រុក្ខាប្រមាញ់ និងនេសាទ និងកម្មវិធីព្រៃឈើជាតិអនុម័តដោយរាជរដ្ឋាភិបាលកម្ពុជានៅថ្ងៃទី១៨ ខែតុលា ឆ្នាំ២០១០ ដែលកម្មវិធីទី៤គឺជាកម្មវិធីសហគមន៍ព្រៃឈើ បានកំណត់ថាត្រូវរៀបចំកំណត់តំបន់ព្រៃសហគមន៍ឲ្យបានប្រមាណ២លានហិកតាក្នុងរយៈពេល២០ឆ្នាំ(២០១០-២០២៩)។
អនុវត្តតាមគោលនយោបាយ និងលិខិតបទដ្ឋានច្បាប់ ព្រមទាំងមានការចូលរួមគាំទ្រពីអង្គការដៃគូអភិវឌ្ឍន៍ បច្ចុប្បន្ននៅទូទាំងព្រះរាជាណាចក្រកម្ពុជាមានសហគមន៍ព្រៃឈើសរុបចំនួន៤៩៩កន្លែង គ្របដណ្តប់លើផ្ទៃដីទំហំ៤១៧.៦៣៥ហិកតា និងមានការចួលរួមពីប្រជាជននៅមូលដ្ឋានចំនួន ១២០.០៨០គ្រួសារ។ សហគមន៍ព្រៃឈើចំនួន ៤០១កន្លែង មានផ្ទៃដីទំហំ៣៣៨.៣១៦ហិកតា ទទួលបានប្រកាសពីក្រសួងកសិកម្មរុក្ខាប្រមាញ់ និងនេសាទ
ក្នុងនោះសហគមន៍ព្រៃឈើចំនួន៣២៨កន្លែង មានផ្ទៃដីទំហំ ២៩៦.២៤០ហិកតា បានចុះកិច្ចព្រមព្រៀងព្រៃសហគមន៍រវាងខណ្ឌរដ្ឋបាលព្រៃឈើសាមីនិងគណៈកម្មការគ្រប់គ្រងសហគមន៍ព្រៃឈើ និងសហគមន៍ព្រៃឈើចំនួន៥០កន្លែង មានផ្ទៃដីទំហំ៣៣.៧២៥ហិកតា ទទួលបានការយល់ព្រមពីខណ្ឌរដ្ឋបាលព្រៃឈើសាមីលើផែនការគ្រប់គ្រងព្រៃសហគមន៍។
កម្មវិធីព្រៃឈើជាតិ មានកម្មវិធីចំនួន៦ ហើយកម្មវិធីសហគមន៍ព្រៃឈើគឺជាកម្មវិធីទី៤ ដែលបានកំណត់នូវសកម្មភាពចំបងចំនួន៣គឺ ការបង្កើតសហគមន៍ព្រៃឈើ ការពង្រឹងស្ថាប័ន និងការផ្តល់សេវាកម្ម ក្នុងនោះការពង្រឹងគណៈកម្មការសម្របសម្រួលកម្មវិធីសហគមន៍ព្រៃឈើ គឺជាផែ្នកមួយនៃការពង្រឹងកិច្ចសហប្រតិបត្តិការរវាងរដ្ឋបាលព្រៃឈើនិងអ្នកពាក់ព័ន្ធ ជាពិសេសសម្រួលដល់ការដោះស្រាយបញ្ហាដែលកើតមានក្នុងការងារសហគមន៍ព្រៃឈើ។ គណៈកម្មការសម្របសម្រួលកម្មវិធីសហគមន៍ព្រៃឈើថ្នាក់ជាតិ (គសកស.ជ) បានបង្កើតឡើងតាំងពីឆ្នាំ២០០៧ ដែលជាយន្តការមួយជួយចែករំលែកនូវព័ត៌មាន សម្របសម្រួលនិងគាំទ្រការងារ ដល់អង្គការដៃគូអភិវឌ្ឍន៍ សហគមន៍មូលដ្ឋាន និងអ្នកពាក់ព័ន្ធ ព្រមទាំងស្វែងរកយន្តការដោះស្រាយបញ្ហា និងតាមដានវាយតម្លៃលើការអភិវឌ្ឍសហគមន៍ព្រៃឈើនៅកម្ពុជាឲ្យមានប្រសិទ្ធភាព។
ដើម្បីពង្រឹងការសម្របសម្រួលការងារជាមួយអ្នកពាក់ព័ន្ធនៅថ្នាក់ក្រោមជាតិឡើយ យើងបានបង្កើតនូវគណៈកម្មការសម្របសម្រួលកម្មវិធីសហគមន៍ព្រៃឈើថ្នាក់ខេត្ត(គសកស.ខ) ដើម្បីបង្កើនកិច្ចសហការជាមួយអង្គការជាដៃគូនៅថ្នាក់ក្រោមជាតិ ជាពិសេសផ្លាស់ប្តូរបទពិសោធន៍ ពង្រឹងអភិបាលកិច្ច កំណត់យុទ្ធសាស្រ្ត និងផ្តល់អនុសាសន៍ដើម្បីធ្វើឲ្យប្រសើរឡើងនូវការអនុវត្តន៍ការងារសហគមន៍ព្រៃឈើនៅមូលដ្ឋាន។
គោលបំណង
កិច្ចប្រជុំលើកទី៣ របស់ គសកស.ជ មានគោលបំណងដើម្បី ៖
- បង្ហាញពីភាពរីកចម្រើនរបស់គម្រោងពាក់ព័ន្ធ និងចែករំលែកនូវព័ត៌មាន បទពិសោធន៍
- ពង្រឹងកិច្ចសហការជាមួយដៃគូពាក់ព័ន្ធ
- ជ្រើសរើសសហគមន៍ព្រៃឈើឆ្នើមប្រចាំឆ្នាំ២០១៥
- កំណត់ទិសដៅ និងយុទ្ធសាស្រ្តបន្ត។
វិធីសាស្រ្ត
ប្រមូលរបាយការណ៍ និងព័ត៌មានពីបណ្តាខណ្ឌរដ្ឋបាលព្រៃឈើ និងអង្គការដៃគូ
- បទបង្ហាញភាពរីកចម្រើន
- ចែករំលែកបទពិសោធន៍
- ការពិភាក្សាជាក្រុម និង
- ការពិភាក្សារួម។
ពេលវេលា និងទីកន្លែង
ថ្ងៃទី២៨-២៩ ខែមករា ឆ្នាំ២០១៦ នៅសណ្ឋាគារខេមរា/ស្ទឹងសង្កែ ខេត្តបាត់ដំបង។
អ្នកចូលរួម
កិច្ចប្រជុំ នឹងមានអ្នកចូលរួមមកពីរដ្ឋបាលព្រៃឈើថ្នាក់កណ្តាល ខណ្ឌរដ្ឋបាលព្រៃឈើ គម្រោងពាក់ព័ន្ធ អង្គការដៃគូរអភិវឌ្ឍន៍ និងសហគមន៍ព្រៃឈើ សរុបប្រមាណ ១២០នាក់ រួមមាន ៖
- ក្រសួងពាក់ព័ន្ធ ០៥ នាក់
- រដ្ឋបាលព្រៃឈើកណ្តាល ១០ នាក់
- រដ្ឋបាលព្រៃឈើមូលដ្ឋាន ២០ នាក់
- អាជ្ញាធរស្រុក និងឃុំ ៣០ នាក់
- អង្គការដៃគូ/គម្រោង ២៥ នាក់
- សហគមន៍ព្រៃឈើ ៣០ នាក់