ឥណទានសហគមន៍ព្រៃឈើក្នុងប្រទេសកម្ពុជាបើកឳកាសឲ្យស្រ្តីបានចូលរួមក្នុងអភិបាលកិច្ច ការការពារព្រៃឈើ និងបញ្ឈប់បទល្មើសព្រៃឈើ
ក្នុងប្រទេសកម្ពុជា វាជារឿងធម្មតាដែលបុរសចូលរួមក្នុងការគ្រប់គ្រងព្រៃឈើ និងធនធានធម្មជាតិ។ នេះដោយសារតែកន្លងមកសម្លេងស្រ្តីត្រូវបានគេបដិសេដក្នុងដំណើរការនៃការធ្វើការសម្រេចចិត្ត ទោះបីស្រ្តីមានចំណេះដឹងយ៉ាងច្រើនពាក់ព័ន្ធនឹងតំបន់ទេសភាពដែលពួកគេរស់នៅ។
បច្ចុប្បន្ននេះ ឥណទានសហគមន៍ព្រៃឈើ បានបង្កើតឳកាសឲ្យស្រ្តីចូលរួមក្នុងដំណើរការនៃការសម្រេចចិត្តពីការគ្រប់គ្រងព្រៃឈើ។ បទពិសោធន៍នេះ ស្របគ្នានឹងការរកឃើញរបស់ការស្រាវជ្រាវមួយ ដែលបង្ហាញថា ការបង្កើនការចូលរួមរបស់ស្រ្តីក្នុងការងារព្រៃឈើ គឺជួយ ពង្រឹងការគ្រប់គ្រង និងបង្កើនការអភិរក្ស ព្រមទាំងជួយដល់ចីរភាពជីវភាពផងដែរ។ នេះគឺដោយសារស្រ្តីមានជំនាញដែលមិនទាន់បានទាញយកមកប្រើប្រាស់សម្រាប់ការគ្រប់គ្រងធនធានធម្មជាតិដោយនិរន្តរភាព។
ឥណទានសហគមន៍ព្រៃឈើចាប់ផ្តើមក្នុងឆ្នាំ២០១៥ ដោយធ្វើការសាកល្បងជាមួយសហគមន៍ព្រៃឈើចំនួន ០៥ ក្នុងតំបន់ទេសភាពព្រៃឡង់ ដែលជាជម្រកសត្វព្រៃដ៏សំខាន់មួយក្នុងតំបន់អាស៊ី។ បច្ចុប្បន្ន ឥណទានសហគមន៍ព្រៃឈើបានពង្រីកទៅសហគមន៍ចំនួន២១ ហើយកំពុងបន្តពង្រីកខ្លួនបន្ថែមទៀត។
កម្មវិធីនេះ បានផ្តល់ថវិការដល់សមាជិកសហគមន៍យកទៅប្រើប្រាស់ក្នុងតំបន់ទេសភាពរបស់ពួកគេ។ សមាជិកសហគមន៍ អាចសម្រេចចិត្តក្នុងការប្រើប្រាស់ថវិកាដែលទទួលបានពីកម្មវិធីនេះ ឧទាហរណ៍ សហគមន៍ខ្លះផ្តល់អាទិភាពក្នុងការប្រើប្រាស់ថវិការនេះសម្រាប់ការល្បាត ដើម្បីបញ្ឈប់បទល្មើសព្រៃឈើ។
កម្មវិធីឥណទាននេះ គឺជាកម្មវិធីមួយ ដែលបានផ្តល់ថវិកាដល់សហគមន៍យកទៅប្រើប្រាស់ក្នុងការគ្រប់គ្រងព្រៃឈើរបស់ពួកគេ។ ពិសេស ជាង៥០% នៃសមាជិក ចំនួន៧៤២នាក់ ជាស្រ្តី។
ចំនួនស្រ្តីចូលរួមមានការកើនឡើង ត្រូវបានបង្ហាញយ៉ាងច្បាស់នៅសហគមន៍ព្រៃត្បូងដំរី ដែលមានចម្ងាយ១៥គីឡូម៉ែត្រពីទីរួមខេត្តកំពង់ធំ ក្រុងស្ទឹងសែន។ ខណៈដែលគណៈកម្មាការសហគមន៍ព្រៃឈើភាគច្រើនជាបុរស គណៈកម្មាការគ្រប់គ្រងឥណទានមានស្រ្តីស្ថិតក្នុងជួរអ្នកដឹកនាំ។
“នៅពេលស្រ្តីចូលរួមក្នុងឥណទានសហគមន៍ព្រៃឈើ ពួកគេបានចូលរួមច្រើនក្នុងដំណើរការគ្រប់គ្រងសហគមន៍ ” លោកស្រី ឡុក ឡៃសឿង មានប្រសាសន៍បែបនេះ។ “នេះដោយសារតែពួកគេទទួលបានព័ត៌មានពីអ្វីដែលបានកើតឡើង និងអាចសម្រេចចិត្តថាតើថវិកាបានពីឥណទានគួរតែប្រើប្រាស់បែបណាក្នុងការគ្រប់គ្រងព្រៃឈើ” ។
លោកស្រី ឡុក ឡៃសឿង និងសមាជិកសហគមន៍ដទៃទៀត មើលឃើញថាការល្បាតព្រៃគឺជាសកម្មភាពអាទិភាព។
“បច្ចុប្បន្នយើងមានថវិកាផ្តល់ជូនអ្នកទៅល្បាតព្រៃសហគមន៍” លោកស្រី និយាយពីថវិកាបានពីឥណទានសហគមន៍ព្រៃឈើ
ការផ្លាស់ប្តូរនេះបានជួយដល់ការគ្រប់គ្រងព្រៃឈើ និងបង្កើនចំណូលដល់សមាជិកផងដែរ។
“ព្រៃឈើរបស់យើងមានភាពល្អប្រសើរ” នេះជាសំដីរបស់លោក ហេង ទាន់ ប្រធានក្រុមឥណទានសហគមន៍ព្រៃឈើ។ “បច្ចុប្បន្នមិនមានសកម្មភាពបទល្មើសព្រៃឈើទៀតឡើយ ដោយសារយើងមានក្រុមល្បាតដែលរឹងមាំ”
រីខូហ្វ បង្កើតឥណទានសហគមន៍ព្រៃឈើ តាមរយៈកិច្ចសហការជាមួយរដ្ឋបាលព្រៃឈើ ក្រោមជំនួយឧបត្ថម្ភពីទីភ្នាក់ងារស្វីសសម្រាប់កិច្ចសហប្រតិបត្តិការ និងការអភិវឌ្ឍ។ សកម្មភាពនេះកំពុងបន្ត តាមរយៈគម្រោងភាពជាដៃគូព្រៃឈើ និងជលផល ដំណាក់កាលទីIIដែលទទួលបានថវិកាពីទីភ្នាក់ងារស្វីសសម្រាប់កិច្ចសហប្រតិបត្តិការ និងការអភិវឌ្ឍ ។